Frá umdæmisstjóra

Þegar þetta mánaðarbréf er skrifað eru flestir rótarýklúbbar að hefja starf að loknu sumarleyfi.  Sú breyting hefur átt sér stað, eftir að heimilað var að fella niður  þrjá fundi samfellt, að starf rótarýklúbba liggur að mestu niðri í júlímánuði. Alþjóðahreyfingin hefur brugðist við þessu m.a. með því að færa áhersluefni/þema júlímánaðar sem var ólæsi yfir í marsmánuð og því er ekki lengur neitt þema í þessum mánuði. Ég vona að sumarið hafi verið rótarýfélögum um land allt gefandi því framundan er spennandi starfsár þar sem allir þurfa að taka þátt og láta gott af sér leiða.

Ég vil byrja á því að bjóða  nýja forseta og ritara velkomna til starfa og senda þeim bestu óskir um velfarnað.  Ykkur hefur verið sýndur sá sómi af félögunum að vera valin til forystu fyrir klúbbstarfið  á starfsárinu. Framundan er annasamt ár sem veitir ykkur ómetanlegt tækifæri til að kynnast fjölbreytileika rótarýstarfsins  og  stuðla að því að efla það góða starf sem þegar er unnið í klúbbunum. Á ykkar herðum hvílir því sú ábyrgð að sjá til þess að að rekstur klúbbsins og framvinda verkefna gangi sem best.