Frá umdæmisstjóra

Nú er tekið að hausta. Starf klúbbanna komið á fulla ferð eftir sumarið og nýir forsetar farnir að fóta sig og marka starfið, hver með sínum stíl og markmiðum. Rótarýhreyfingin er öflug hreyfing öflugra félaga og það að nýir forsetar taka við 1. júlí ár hvert þýðir að ferskir vindar blása stöðugt. Viðtakandi forseti á setu í stjórn sem slíkur í eitt ár sem tryggir að ákveðin festa helst í starfinu. Það að nýir koma að stýrinu ár hvert má ekki þýða það að öllu sé umturnað. Nauðsynlegt er að viðhalda stöðugleikanum og rugga bátnum ekki um of. Hins vegar er það aðeins af hinu góða að nýr blær kemur á fundarstjórn og ný nálgun á sér stað. Allt leiðtogastarf kallar á að sá sem gegnir því á hverjum tíma hafi sterka sýn á starfið, hafi stefnufestu, mildi og mýkt til að bera, þekki söguna og geri einkunnarorð Rótarý að sínum. Takist þetta þarf ekki að hafa áhyggjur af starfi Rótarý í þeirri framtíð sem bíður okkar. Nýir félagar munu laðast að og vera tilbúnir til að taka við fánanum.