Heimsóknir umdæmisstjóra til klúbbanna
Að uppfylla skyldu þarf ekki að vera leiðinlegt verkefni, þvert á móti er reynslan sú að heimsóknirnar eru það sem stendur uppúr í huga fráfarandi umdæmisstjóra að umdæmisárinum loknu. Það er einstaklega ánægjulegt að heimsækja klúbbana Fá alls staðar frábærar móttökur og mynda tengsl sem geta varað þann tíma sem viðkomandi aðilar eiga eftir ólifað. Það að upplifa mismunadi áherslur, baráttuanda og skynja þá vináttu sem ríkir meðal félaganna er ómetanlegt. Ég hef þegar þetta er skrifað heimsótt 8 klúbba. Vissulega er flóran mismunandi. Klúbbarnir eru mismunandi að stærð. Sumir eru í harðri varnarbaráttu vegna ýmissa ytri aðstæðna heima í héraði. Aðrir eru á fleygiferð og félögum fjölgar. Eitt er þó sammerkt með öllum klúbbunum, Rótarýhugsjónin lifir og hvergi eru menn tilbúnir til að gefast upp.