Fréttir
Umræðufundur á rótarýdegi
Rótarýklúbburinn Reykjavík-Miðborg gekkst fyrir umræðufundi í Háskólanum í Reykjavík á rótarýdeginum 24. febrúar 2018. Til umræðu voru umhverfismál. Jakob Frímann Magnússon, framkvæmdastjóri Miðborgarinnar okkar, Ragna I. Halldórsdóttir, deildarstjóri í umhverfis- og fræðsludeild Sorpu, og Thomas Möller, verkfræðingur og klúbbfélagi, fluttu erindi.Í erindi sínu fjallaði Jakob Frímann Magnússon um umhverfisvernd frá persónulegu sjónarmiði. Hann varpaði því fram að fólk ætti alltaf að efast um að allar framfarir væru jákvæðar, áhrifin á mannslíkamann væru oft meiri en talið væri í fyrstu. Nefndi hann rafmagnsbíla og hitaveituboranir sem dæmi.
Ragna I. Halldórsdóttir fjallaði um flokkunarkerfi Sorpu sem er orðið býsna öflugt. Hún greindi frá þeim breytingum sem verða 1. mars 2018 þegar íbúar í Garðbæ, Hafnarfirði, Mosfellsbæ og Seltjarnarnesi geta farið að setja plastpoka með plastúrgangi í tunnuna fyrir venjulegt heimilissorp (orkutunnuna). Þá fjallaði hún um metanframleiðslu Sorpu.
Thomas Möller fjallaði um það sem hver einstaklingur getur gert til að vernda umhverfið. Mikilvægt er að byrja heima, flokka sorpið rétt, nota margnota burðarpoka og margnota umbúðir. Hann benti á að Íslendingar væru með eitt mesta vistspor í heiminum þannig að þjóðin skuldar umhverfinu að ganga vel um það.
Því miður var fundurinn fámennur. Umræður voru engu að síður líflegar.
