24.5.2016

Sophie kveður

Rótarýklúbburinn Reykjavík-Miðborg fóstraði tævanska skiptinemann Sophie Chiang á skólaárinu 2015-2016. Sophie mætti á fund klúbbsins 23. maí 2016 til að kveðja því hún heldur af landi brott í lok maí eftir ánægjulega dvöl á Íslandi.

Það var ungmennanefnd klúbbsins (Páll Harðarson formaður, Gunnhildur Arnardóttir og Sævar Freyr Þráinsson) sem sinnti Sophie mest fyrir hönd klúbbsins.

Sophie er 17 ára. Hún heitir réttu nafni Feng-Yun en kýs að kalla sig Sophie. Hún býr í borginni Taichung City í vesturhluta Tævans. Íbúar borgarinnar eru rúmlega 2,7 milljónir.

Faðir Sophie, Tzu-Hang, er dósent við háskóla í borginni. Móðir hennar, Wei-Chun, er heimavinnandi. Sophie á eldri bróður og yngri systur.

Sophie stundar nám í framhaldsskóla í heimaborg sinni. Hún er á matreiðslubraut. Auk námsgreina sem tengjast matreiðslu á ýmsa lund, lærir hún kínversku, ensku, sögu, landafræði, listir o.fl. Hún leggur sérstaka áherslu á eftirrétti í náminu. Helstu áhugamál hennar eru eftirréttir, flautuleikur og ljósmyndun.

 Á meðan Sophie dvaldi á Íslandi sótti hún Menntaskólann í Kópavogi. Þar lagði hún stund á íslensku, matreiðslu, frönsku og bókmenntir.