Ungmennastarf og skiptinemi
Á fundi í Rótarýklúbbnum Reykjavík-Miðborg 4. nóvember 2013 var fjallað um ungmennaþjónustu. Hanna María Siggeirsdóttir, formaður ungmennanefndar klúbbsins og formaður æskulýðsnefndar rótarýumdæmisins, fór yfir ungmennastarf á vegum rótarýhreyfingarinnar. Sérstaklega ræddi hún um nemendaskiptin en Íslendingar hafa nýtt sér þau umfram annað ungmennastarf. Í vetur fóstrar klúbburinn Daria Wittwer, svissneska stúlku sem stundar nám í Fjölbrautaskólanum í Garðabæ.
Á yfirstandandi vetri dvelja fjórir íslenskir nemendur erlendis á vegum rótarýhreyfingarinnar, í Bandaríkjunum, Ekvador, Frakklandi og Sviss. Á móti dvelja þrír erlendir nemendur hér á landi, frá Bandaríkjunum, Ekvador og Sviss.
Hanna María rifjaði upp að Rótarýklúbburinn Reykjavík-Miðborg hefði fóstrað Abbigail Seasly frá Bandaríkjunum veturinn 2010-2011 og nú fóstraði hann Daria Wittwer frá Sviss. Hvatti hún til þess að klúbburinn efldi þennan þátt í starfseminni enn frekar því hann væri svo gefandi. Fræðast má um ungmennastarf rótarýhreyfingarinnar á vef umdæmisins (smellið hér).
Daria kynnti sjálfa sig og heimaslóðirnar á ótrúlega góðri íslensku eftir aðeins tveggja mánaða dvöl hér á landi. Hún er 16 ára og á eina eldri systur. Foreldrar hennar, Andreas og Barbara, eru hljóðfæraleikarar og tónlistarkennarar. Fjölskyldan býr í Untersiggenthal sem er um 7.000 manna bær rétt norðvestur af Baden.
Daria hefur lokið einu ári í menntaskólanum Kantonsschule Wettingen sem er í nágrenni við heimabæ hennar. Hún gerir ráð fyrir að halda áfram á þriðja ári eftir dvölina á Íslandi og námið í Fjölbrautaskólanum í Garðabæ.
Daria er á tungumálabraut en tónlistin á einnig hug hennar. Hún lærir bæði á fiðlu og píanó og syngur auk þess í kór. Fiðlan fylgdi henni til Íslands og sækir hún fiðlutíma í Tónlistarskóla Garðabæjar. Þá hefur hún gengið til liðs við Gradualekór Langholtskirkju.
Auk tónlistarinnar hefur Daria stundað fimleika í áraraðir, snjóbretti og reiðmennsku, þar sem hún kynntist íslenska hestinum. Vonandi fær hún næg tækifæri í vetur til að fara á snjóbretti í Bláfjöllum og kynnast íslenska hestinum betur því hana langar til að fara á hestbak á meðan hún dvelur hér á landi.
Daria segir að sig hafi langað til að fara til Íslands sem skiptinemi vegna þess að hún vildi fara á norðurslóðir, hún vildi læra nýtt tungumál og hún vildi kynnast einhverju óvenjulegu. Þess vegna varð Ísland fyrir valinu fremur en eitthvert hinna Norðurlandanna.
Daria er ánægð með dvölina hingað til. Hún viðurkennir að það hafi komið sér á óvart að aginn í skólanum sé nokkru minni en hún eigi að venjast í Sviss. Henni líkar útivist, fjallgöngur, myndatökur á víðavangi eða bara að njóta náttúrunnar. Daria vonast til að komast sem oftast út fyrir höfuðborgarsvæðið og að hún fái að sjá sem mest af landinu á meðan hún dvelur hér.
Að lokum bauð Daria klúbbfélögum upp á svissneskt súkkulaði, besta súkkulaði í heimi að hennar sögn!