29.8.2013

Heimsókn til Ölgerðarinnar

Rótarýklúbburinn Reykjavík-Miðborg heimsótti Ölgerðina Egil Skallagrímsson 28. ágúst 2013. Þar tók Októ Einarsson, starfandi stjórnarformaður félagsins á móti hópnum. Ölgerðin fagnar aldarafmæli sínu í ár.

Rúmlega 20 félagar í Rótarýklúbbnum Reykjavík-Miðborg lögðu leið sína í Ölgerðina. Októ Einarsson, starfandi stjórnarformaður félagsins hélt stutta kynningu á félaginu. Hann stiklaði á stóru í einnar aldar sögu og hvernig margar af framleiðslu- og innflutningsvörum félagsins eru fyrir löngu orðnar hluti af íslenskri menningu. Hann greindi frá helstu þáttum í starfsemi félagsins og fjárhagsstærðum, samruna Ölgerðarinnar og heildverslunarinnar Danól í ársbyrjun 2008 og hremmingar í kjölfar bankahrunsins í október sama ár. Fram kom að reksturinn hafi gengið afar vel síðustu misseri. 

Að loknu erindi Októs gekk hann með hópnum um húsnæði félagsins að Grjóthálsi. Leiðin lá um skrifstofurými þar sem allt starfsfólk er í opnu rými, átöppunarsali, bjórframleiðslusal og risavaxið lagerhúsnæði. Göngutúrinn endaði í Bjórskólanum og þar var boðið upp á fast og fljótandi fæði.

Í máli Októs kom m.a. fram að Ölgerðin hefði í tvö sumur (2012 og 2013) boðið erlendum ferðamönnum upp á bjórheimsókn til Ölgerðarinnar gegn gjaldi. Þar fengju þeir að smakka sérbjór, bjórlíki sem Íslendingar neyttu í nokkrum mæli í aðdraganda bjórfrelsins 1989 og íslenskt brennivín. Þessar smökkunarferðir hafa notið mikilla vinsælda og komu um 1.200 manns sumarið 2012.