Sunnudagur í skóglendinu
Klúbburinn efndi til könnunarferðar í skógræktarreit sinn í Heiðmörk sunnudaginn 5. maí.
Fyrir margt löngu fékk klúbburinn úthlutað ræktunarreit fyrir trjágróður í Heiðmörk. Frá því að Heiðmörkin var yfirlýst skógræktarland Reykvíkinga árið 1950 hafa mörg áhugamannafélög fengið þar skika til skógræktar. Misvel hefur gengið eins og almennt gerist um trjárækt í landinu og fór svo að klúbburinn skaut þessu verkefni sínu á frest enda árangur lítt sýnilegur eftir nokkrar skógræktarferðir.
Í vorferð klúbbsins 2013 var þráðurinn tekinn upp að nýju. Félagar og makar ásamt skylduliði fóru í síðdegisferð á útivistarsvæðið í Heiðmörk en fyrst var höfð viðdvöl á Elliðavatni, þar sem Skógræktarfélag Reykjavíkur hefur nú aðsetur fyrir starfsemi sína. 
Félagið hefur á umliðnum áratugum unnið afar merkt starf við ræktun skógar í borginni og nágrenni hennar, m.a. í Öskjuhlíð, Elliðaárdal, Esjuhlíðum auk Heiðmerkur. Félagið annaðist um áratugaskeið uppvöxt allra trjáplantna fyrir Reykjavíkurborg í gróðarstöð sinni í Fossvogi. Vinnuskóli unglinga hafði það hlutverk að planta trjánum út.
Ýmsir klúbbfélagar tóku til hendinni, þegar komið var í ræktunarreit klúbbsins og stungu niður allmörgum plöntum og gróðursettu auk þess tvö tré, sem hafa beðið gróðursetningar á svæðinu
.
Að lokinni þessari vitjun var aftur haldið að Elliðavatni, þar sem borinn var fram grillmatur og annað ljúfmeti.
Texti og myndir Markús Örn Antonsson.
