Gerðubergskórinn í heimsókn hjá klúbbnum
Gerðubergskórinn veitti viðtöku ferðastyrk frá klúbbnum á fundi 19. nóvember sl. Er þetta í annað sinn sem kórinn hlýtur slíkan styrk.
Gerðubergskórinn er söngsveit eldri borgara sem hefur aðsetur fyrir æfingar sínar í félagsmiðstöðinni Gerðubergi í Breiðholti.
Á undanförnum árum hefur kórinn verið þátttakandi í viðburðum víða og m.a. heimsótt samkomustaði eldri borgara til að skemmta viðstöddum með söng sínum.
Starf kórsins mælist mjög vel fyrir en vegna hækkunar á ferðakostnaði var tvísýnt um framhald á hinni öflugu dagskrá hans í þágu almennings. Þá hljóp Rótarýklúbburinn Reykjavík-Breiðholt undir bagga og veitti 100 þús. króna ferðastyrk í fyrra og var það endurtekið nú.
Sigurður Már Helgason veitti styrknum móttöku fyrir hönd kórfélaganna og flutti forseta klúbbsins Friðriki Alexanderssyni og klúbbfélögum öllum bestu þakkir fyrir hugulsemina. Því næst söng kórinn nokkur lög við hinar bestu undirtektir. Stjórnandi kórsins er Kári Friðriksson en Árni Ísleifsson leikur undir á píanó.
Texti og myndir Markús Örn Antonsson
