Heimsókn til Íslandspósts h.f.
Klúbbfélagar fóru í heimsókn í aðalbækistöðvar Íslandspósts h.f. við Stórhöfða í Reykjavík mánudaginn 5. mars.
Farin var skoðunarferð um póstmóttökustöðina og síðan í skrifstofubygginguna, þar sem hlýtt var á erindi Ingimundar Sigurpálssonar, forstjóra, um starfsemi fyrirtækisins. Snæddur var léttur málsverður í boði Íslandspósts.
Þeir Hjörtur Sigvaldason, Kjartan Flosason og Tryggvi Þorsteinsson greindu frá fjölbreyttum þáttum starfseminnar hjá þessu mikilvæga þjónustufyrirtæki, sem hefur um 1200 manns í vinnu. Heildartekjur fyrirtækisins á síðasta ári námu 6,5 milljörðum króna og jukust um 3% frá fyrra ári.
Meðal annars var fylgt eftir ferli flokkunar á pósti, ýmist með flokkunarvél, sem les póstnúmer, eða í handavinnu. Um póststöðina, sem er í 6000 fermetra húsnæði að Stórhöfða 32, fara að jafnaði um 150 þúsund bréf á dag í innanlandspósti, um 3000 sendingar fara daglega til útlanda og frá útlöndum koma um 6000. Póstur er sendur héðan í flugi beint til 8 landa í Evrópu og til Bandaríkjanna en að öðru leyti hefur verið samið við danska póstinn um framhaldssendingar um Kaupmannahöfn.
Athyglisvert var að kynnast nýjungum í rekstri útkeyrsludeildar á höfuðborgarsvæðinu, sem hefur yfir að ráða 54 bílum, þar af eru 30% metangasbílar. Ökusíritar eru í bílunum og skrá upplýsingar um aksturslag og stopptíma sem lagt er til grundvallar frammistöðumati og hvatningarverðlaunum til bílstjóra, sem veitt eru mánaðarlega.
Í máli Ingimundar Sigurpálssonar kom fram að 11 pósthús starfa á höfuðborgarsvæðinu en yfir 60 pósthús og afgreiðslur eru á landsbyggðinni. Póstkassar eru 200 talsins víða um land. Yfir 100 bílar eru í akstri daglega um allt landið og um 400 bréfberar eru að störfum.
Myndir og texti: Markús Örn Antonsson
