Ungir skákmenn úr Kópavogi fá viðurkenningu
Laugardaginn 19. desember fengu fjórir ungir skákmenn viðurkenningu frá Rótarýklúbbi Kópavogs en klúbburinn hefur það á stefnuskrá sinni að styðja við bakið á ungum og efnilegum skákmönnum sem búsettir eru í Kópavogi.
Fjórir ungir skákmenn fengu sl. laugardag viðurkenningu frá Rótarýklúbbi Kópavogs en klúbburinn hefur það á stefnuskrá sinni að styðja við bakið á ungum og efnilegum skákmönnum sem búsettir eru í Kópavogi. Það var Helgi Sigurðsson læknir, formaður viðurkenningarnefndar Rótarýklúbbsins og fyrrverandi forseti klúbbsins sem afhenti viðurkenningarnar í Stúkunni á Kópavogsvelli sem í dag er helsti keppnisstaður skákarinnar í Kópavogi.
Vignir Vatnar Stefánsson fékk afhent skjal til staðfestingar á stuðningi klúbbsins við þátttöku hans á heimsmeistaramóti ungmenna í Durban í Suður-Afríku í fyrra en klúbburinn lét af hendi rakna 120 þús. krónur vegna þátttöku Vignis. Vegna þátttöku bræðranna Björns Hólms Birkissonar, Bárðar Arnar Birkissonar og Dawid Kolka á heimsmeistaramóti ungmenna í Porto Carras í Grikklandi fyrir nokkrum vikum fékk hver kr. 40 þús. Fjórmenningarnar fengu allir afhent viðurkenningarskjal undirritað af Helga Sigurðssyni.
Foreldrum var boðið að vera viðstaddir afhendinguna og í tilefni þess var borin fram dularfull súkkulaðikaka en í henni var skákþraut úr smiðju Sherlock Holmes. Hvítur átti leik og fengu viðstaddir takmarkaðan tíma til að svara þeirri spurningu hver síðasti löglegi leikur svarts hefði verið – sjá meðfylgjandi mynd en andlitsfall Sherlocks og pípan er greypt í kökumynstrið.
Ofanritað er frétt á skak.is frá afhendingu viðurkenningar Rótarýklúbbs Kópavogs.
