Jólagjafir og jólaljóð
Boðið var upp á Gammeldansk og ljóðalestur á fundi sem haldinn var 15. desember sl.
Fundur sem haldinn var 15. desember sl. var í umsjón menningarmálanefndar en þar er formaður Málfríður Klara Kristiansen.
Þriggja mínútna erindið hélt Baldur Sæmundsson og talaði um minnisverðar máltíðir og bauð auk þess upp á sérstakar veitingar á morgunverðarborðinu, þ.e. Gammel dansk síld, sinnepssíld og laxapönnukökur sem var allt hvert öðru ljúffengara. Hann sagði frá matarreynslu á ferðalögum víða um lönd s.s. misheppnuðum sardínum í Portúgal, lóum í Amsterdam og mörgu fleiru.
Aðal fyrirlesari dagsins var Þórður Helgason félagi í Borgum. Þórður gaf öllum eigin útgáfu af Jólaljóðum, sér útgefinni ljóðabók sem innihélt 30 ljóð og var prentuð og frágengin af höfundinum sjálfum. Hann las ljóðin og einnig þýðingar af völdum bréfum til jólasveinsins.
Jólaskap:
Unglingurinn gefur sjitt í allt
og neitar að fara í jólaskap
Verður þó tíðrætt um Djíshús
og Kræst
og Djíshús Kræst
þegar jólafötin finnast.
Jólasögur:
Afi segir einu sinni enn
söguna af því
þegar hann var rétt orðinn úti
á Þorláksmessu
sem leiðir hann inn á braut
almennra hrakningasagna
um sjóslys og snjóflóð
þar til hann er stoppaður af
Það eru jólin maður !
Birna forseti kynnti jólaglaðning stjórnar til allra klúbbfélaga, sem voru drykkjarkrúsir með merki Borga og fjórprófi Rótarý áletruðu. Útlit krúsanna er hannað af Ólöfu Þorvaldsdóttur félaga í Borgum. Stjórnin setti upp jólasveinahúfur í tilefni dagsins og útbýtti krúsum til allra fundarmanna.