Nýir félagar, rakur fundur og fyrrverandi forseti lýðveldisins í heimsókn – fundir klúbbsins í júní.
Starfsemi Rótarýklúbbsins Borga hefur verið lífleg í júní. Nýir félagar hafa verið teknir inn í klúbbinn, fundur verið haldinn úti undir berum himni og fyrrverandi forseti lýðveldisins Vigdís Finnbogadóttir heimsótti klúbbinn.
Ýmislegt hefur verið á döfinni hjá klúbbfélögum sl.mánuð. Tveir nýir félagar voru teknir inn í klúbbinn í byrjun mánaðarins. Það eru þau: Margrét Halldórsdóttir flugfreyja og Kristján Hjálmar Ragnarsson sjúkraþjálfari en hann var félagi í klúbbnum fyrir nokkrum árum. 
Á þeim sama fundi sagði forseti Rótaract, Þórhildur Magnúsdóttir, frá ferð til Indlands í febrúar 2011 þar sem Rotaract og Rótarýfélagar tóku þátt í að bólusetja indversk börn gegn lömunarveiki.
Félagar hituðu upp fyrir þjóðhátíðardaginn með því að hittast seinnipart 16. júní í Guðmundarlundi. 
Fjölskylda Guðmundar H. Jónssonar gaf Skógræktarfélagi Kópavogs 7 hektara landssvæði árið 1997 sem telst nú til Heiðmerkur. Gjöfin innibar einnig kofa þann sem stendur á landssvæðinu. Bjarnheiður Guðmundsdóttir félagi í Borgum, dóttir Guðmundar sagði frá tilurð og sögu lundarins og Jónína Þ. Stefánsdóttir sagði frá starfi Skógræktarfélags Kópavogs. Farið var í ratleik og lagið tekið við undirleik Bjarka Sveinbjörnssonar á harmonikku. Vísur voru ortar við þetta tilefni og fylgja þær hér:
Gengum við um Gvendarlund ítar mega það sanna
Áttum eina blauta stund
áður en snerum við til manna.
Göngum við í Guðmundarlund
góðan höldum skriffund
leikum okkur litla stund
og ljúfan tökum drykk í mund.
Guðmundarlundur er léttur sem glundur
og létt er okkar geð
ef til vill sígur því á okkur blundur
- eða þannig séð
Gaman er í Guðmundarlundi
í góðu veðri og röku
en nú rembist ég á Rótarýfundi
og rugla með þessa stöku.
Í rigningu' í ratleik að vera
er rosalega blautt
Brölta um skóginn og bera
blaðið sem næstum er autt. (GJ)
Margt gerðist í Guðmundarlundi,
grill var þar sett upp og bar,
er Borgafólk birtist á fundi
og býsna vel skemmti sér þar. (IKr.St.)
Þann 24. júní heiðraði frú Vigdís Finnbogadóttir fyrrverandi forseti lýðveldisins, klúbbinn með heimsókn sinni. Hún fjallaði um Stofnun Vigdísar Finnbogadóttur í erlendum tungumálum, sem er rannsóknarstofnun innan Hugvísindastofnunar Háskóla Íslandans. Vigdís sagði að um 6000 tungumál væru nú töluð á jörðinni og væri talið að um 50% af þeim myndu líða undir lok á þessari öld. Það væri álitin afleiðing af meiri menntun jarðarbúa þar sem kennsla færi ekki fram á jaðarmálum. Taldi Vigdís að hlutverk stofnunar VF væri að minna á nauðsyn þess að varðveita tungumál.
