Ofvirkni og lyfjanotkun
Mikil aukning í notkun ofvirknilyfja á Íslandi
Fundur í Rótarýklúbbnum Borgum var haldinn í dag 31. mars og hófst að venju 7,45 og lauk upp úr dagmálum. Dagskrá fundarins var í umsjón dagskrár og þjóðmálanefndar. Kristján Guðjónsson kynnti fyrirlesara dagsins sem var Guðrún I. Gylfadóttir lyfjafræðingur, deildarstjóri lyfjadeildar Sjúkratrygginga Íslands. Guðrún sagði frá þróun í notkun ofvirknilyfja á Íslandi og bar saman við neysluna á Norðurlöndunum.
Ísland sker sig úr hvað varðar notkun lyfjanna sem er miklu meiri en á hinum Norðurlöndunum. Notkun lyfjanna hefur mjög aukist á Íslandi og frá árinu 2006 hafa fjárhæðirnar sem um ræðir aukist um mörg hundruð milljónir.
Aðgerðir sem heilbrigðisyfirvöld hafa gripið til í þeim tilgangi að stemma stigu við notkun þessara lyfja eru m.a.:
Breyttar reglur Sjúkratrygginga Íslands um útgáfu lyfjaskírteina til að koma í veg fyrir að einstaklingur geti fengið ávísað þessum lyfjum frá mörgum læknum. Umsjón með frumgreiningu á ADHD hjá fullorðnum og eftirlit með meðferð verður bundin við geðsvið Landspítala. Aukið eftirlit landlæknis með ávísunum lækna á lyfjum sem þessum.
