Hugarfar sigurvegarans
Í dag var fundur í Rótaryklúbbnum Borgum í umsjón Æskulýðsnefndar. Ólafur Kristjánsson þjálfari meistaraflokks Breiðabliks í knattspyrnu ræddi um þjálfun ungmenna til árangurs.
Í dag var fundur í Rótaryklúbbnum Borgum í umsjón Æskulýðsnefndar. Ólafur Kristjánsson þjálfari meistaraflokks Breiðabliks í knattspyrnu ræddi um þjálfun ungmenna til árangurs. Ólafur gerði grein fyrir starfi sínu hjá Breiðabliki undanfarin 4 ár og hvernig hann markvisst hefur unnið með liðsmönnum að ná því markmiði sem náðist í haust þegar Breiðablik varð Íslandsmeistari í meistaraflokki karla í knattspyrnu. Lagði hann áherslu á að hugarfarið væri það sem allra mestu máli skiptir til þess að ná árangri og þá ekki endilega í íþróttum heldur í flestu í lífinu. Hann lagði áherslu á gildi íþrótta í lífi ungmenna, hvernig þar færi fram eða ætti að fara fram uppbygging á sjálfstrausti og eðlilegum metnaði. Til gamans má geta þess að a.m.k. 3 félagar Borga hafa gegnt formennsku hjá Breiðabliki !
Kópavogsbúar geta verið stoltir af því frábæra íþróttafólki sem byggir bæinn og fara þar afreksíþróttamennirnir fram með kyndilinn öðrum til eftirbreytni. Má þar nefna kvennalið Gerplu í fimleikum sem náði þeim einstaka árangri að vinna til gullverðlauna á Evrópumótinu í hópfimleikum, sem fram fór í Malmö í Svíþjóð í október 2010.
