Þórhallur Sigtryggsson, móðurætt

Félagi Þórhallur Sigtryggsson fór með erindi um móðurætt sína sem telst húnversk ef farið er fjóra ættliði aftur og tengist svo hvoru tveggja til suðvesturhorns, austur í Kelduhverfi og vestur á Mýrar. Langa-langafi hans var Kristján "ríki" Jónsson sem rak sauðfé sitt suður Kjöl til að forða því frá niðurskurði sem koma átti í veg fyrir kláðaútbreiðslu. Þessi rekstur var í óþökk ýmsra fylkinga sauðfjárbænda. Kristján giftist tveimur sér eldri konum til fjár, að því er talið er, og var í barnlausum hjónaböndum en átti þeim mun fleiri börn með vinnukonum sem hann gekkst við flestum. Eitt barnanna var Benedikt Kristjánsson sem síðar ákvað á örlagastundu að ganga í prestaskóla í stað þess að hverfa til náms í Kaupmannahöfn. Þórhallur telur sig Húsvíking því hann fæddist þar og ólst upp en þegar grannt er skoðað er hann víða að og það á sennilega við um mörg okkar. Meðfylgjandi mynd frá árinu 1900 er af fyrrnefndum langafa Þórhalls, Sr. Benedikt Kristjánssyni presti á Grenjaðarstað með fjölskyldu sinni.