Sigling Smára Sigurðssonar og félaga til Scoresbysunds

Smári Sigurðsson, forstöðumaður Kirkjugarða Akureyrar, var gestur fundarins. Hann sagði frá ferð "Gógó til Grænlands", en það er ævintýraleg sigling heimasmíðaðrar stálskútu til Scoresbysunds. Skipstjóri í ferðinni og bátseigandi var Knútur Karlsson og með í för auk Smára þeir Ögmundur Knútsson, Kjartan Bjarnason, Anton Brynjarsson, Ísak Oddgeirsson og Níels Einarsson, forstöðumaður Stofnunar Vilhjálms Stefánssonar kom með sem gestur. Hátt í 11 þúsund ljósmyndir voru teknar í ferðinni og sýndi Smári nokkrar þeirra. Siglingin frá Akureyri til Ittoqqortoormiit tók um 2,5 sólarhringa, en það er um 450 manna þorp við mynni sundsins. Þar tekur við stærsta fjarðabyggð í heimi sem þekur 38 þúsund m², lengsti fjörður er um 350 km og dýpi á bilinu 150 til 400 m. Fólk var á sínum tíma (um 1822, 70 inúítar) flutt nauðugt til svæðisins í landabaráttu Dana og Norðmanna. Þorpið er byggt á klöpp enda enginn laus jarðvegur og t.d. kirkjugarðurinn er sprengdur í klöpp. Engin höfn er á staðnum og bátar (opnir plastbátar) eru dregnir á land. Í eyðiþorpi eiga tveir Akureyringar sumarhús. Lítil atvinna er á staðnum en einhver ferðaþjónusta að byrja, meðal annars frá Íslandi (Opal frá Húsavík og Dagmar frá Þýskalandi). Samfélagið er kostað af Dönum. Olía er eini orkugjafinn. Ferðalangarnir komu ekki auga á hvítabjörn en sáu sauðnaut, héra og moskítóflugur sem komust í feitt (bátsmenn). Bláberin voru góð við jökulrætur en krækiberin vond. Stórkostleg náttúra og margt spennandi fyrir jarðfræðinga - einn stapinn er kallaður Grundtvigskirkja en hann minnir á þá dönsku kirkju. Í eitt sinn brotnaði úr rekís rétt við hliðina á gúmmíbát sem nokkrir þeirra voru í og náðist það háskalega atvik á mynd.
Félagar voru forvitnir um þessa merku ferð og Smári fékk nokkrar spurningar, m.a. um skinnin sem heimamenn súta ekki og þurfa því að endurnýja reglulega. Þó er enginn útflutningur leyfður á skinnum.