Félagi okkar Þórir Jónsson er látinn
Lést þann 1.júlí á Líknardeild Landsspítalans í Kópavogi
Góðir félagar.
Okkur bárust þær sorgarfréttir, að félagi okkar Þórir Jónsson er látinn. Hann lést á líknardeild Landspítalans í Kópavogi 1. júlí síðastliðinn, á nítugasta og fyrsta aldursári. Þórir gekk í Rótarýklúbb Reykjavíkur þann 18.júní 1974 og hafði því verið félagi í 43 ár.
Þórir fæddist í Reykjavík 22. ágúst 1926, sonur Jóns Ragnars Jónssonar skipasmiðs og Sigríðar Hannesdóttur verkakonu. Hann lauk námi í bifvélavirkjun 1946. Þórir var umsvifamikill meðal annars í iðnaði, viðskiptum og íþróttum. Þórir stofnaði og rak vélaverkstæðið Þ. Jónsson og Co., hann rak um margra ára skeið Fordumboðið Svein Egilsson og var einn helsti baráttumaður stofnunar skipafélagsins Bifrastar, sem gerbreytti bílainnflutningi til Íslands. Þá sat hann í stjórn Reykjaprents sem stóð að útgáfu Vísis og DV um árabil.
Þórir keppti fyrir Íslands hönd í svigi og bruni á vetrarólympíuleikunum í St. Moritz árið 1948, fyrstu vetrarólympíuleikunum sem Ísland keppti á. Hann var virkur baráttumaður framþróunar á aðbúnaði og umgjörð til skíðaiðkunar. Einnig gegndi Þórir ýmsum félagsstörfum; var formaður Bílgreinasambandsins, formaður skíðadeildar KR, formaður Skíðasambands Íslands og félagi í Rótarýklúbbi Reykjavíkur. Þá var hann sæmdur heiðursstjörnu Skíðasambands Íslands og gullmerki KR með lárviðarsveig fyrir störf sín í þágu skíðaíþróttarinnar.
Þórir lætur eftir sig eiginkonu, Láru J. Lárusdóttur, og fjögur börn. Við minnumst góðs félaga með söknuði og sendum fjölskyldu Þóris okkar innilegu samúðarkveðjur.
