Saga ljósanna í kirkjugarðinum í Ólafsfirði.
Eftirfarandi samantektir bárust umsjónarmanni síðunnar nú á dögunum.
Þar er farið yfir sögu ljósanna í kirkjugarðinum.
Jólatréð í Ólafsfjarðarkirkjugarði.
Rótarýklúbbur Ólafsfjarðar hefur alla tíð frá árinu 1978 sett upp jólatré í garðinn.
Kveikt var á því venjulega eftir síðasta fund fyrir jól, að fundi loknum var kveikt á trénu og sungið Heims um ból.
Þessi siður var svo aflagður og farið að kveikja nokkru fyrr. Nú er haldin helgistund í garðinum, kirkjukórinn syngur jólasálma og sóknarpresturinn flytur hugvekju og bæn.
Allar perurnar á trénu er hvítar að því undanskyldu að ein pera á toppi jólatrésins er rauð.
Á fyrstu árunum, var lítið notað af kertum en þar hefur orðið mikil aukning. Kveikt er á kertunum á aðfangadag og gamlársdag, all nokkrar skreytingar með grenihríslum tíðkast.
Upphaf lýsingar í kirkjugarðinum í Ólafsfirði.
Það mun hafa verið um 1960 sem farið var að setja rafmagnsljós á leiði í kirkjugarðinum.
Á fyrstu árunum voru settir upp trékrossar með sex ljósum. Perurnar voru 15 Wött – 220V.
Miklir erfiðleikar voru að ná í rafurmagn, vegna þess að ekkert rafurmagn var í garðinum. Þess vegna varð að fá það úr götuljósastaur sem var rétt við garðinn. Þetta tókst og settir voru upp 15 krossar í upphafi.
Stundum var miklum erfiðleikum háð að halda ljósum á krossunum. Það fór eftir veðráttu hvernig það gekk. Svo fór krossunum fjölgandi og munu Þeir hafa verið 20-25. Þar sem viðhald var mikið og búnaður ekki nógu góður var hætt að nota þá milli 1970-1980. Það voru þó, nokkrir krossar notaðir af og til.
1980 voru svo teknir í notkun plastkrossar sem framleiddir voru á Reykjalundi. Nú var komið hús í garðinn og rafmagn og notaður var spennir 32V. Í upphafi voru settir 25-30 krossar. Um framkvæmd sáu Magnús Sigursteinsson bifvélavirki, Hilmar Tryggvason málari og Albert Magnússon, þeir héldu þessu áfram til 1992 en þá voru 150 krossar í notkun.
1992 tók svo Rótarýklúbbur Ólafsfjarðar við og hefur það enn. Nú um jólin (2005) voru settir upp 250 stk.
Rótarýklúbburinn hefur lagt rafmagn um garðinn.
Heimildir:
Magnús Sigursteinsson
Rótarýklúbbur Ólafsfjarðar
Magnús Stefánsson rafvirki, sem sá um fyrstu raflýsingu í kirkjugarðinum.
Samantekt:
Magnús Stefánsson, rafverktaki – Ólafsfirði 5/3 ‚2005.
Ljósmyndir: K,Haraldur Gunnlaugsson.
