Rótarýdagurinn 2017.
Haldinn á Íslandi laugardaginn 6. mai n.k.
Rótarýklúbbur Ólafsfjarðar mun í tilefni dagsins standa fyrir kynningu á Rótarýhreyfingunni á Kaffi Klöru á milli kl. 13 og 15 n.k. laugardag.
Rótarýklúbbur Ólafsfjarðar eins og aðrir Rótarýklúbbar á Íslandi mun sem fyrr segir kynna starf Rótarýmanna, bæði í klúbbnum hér í Ólafsfirði; í íslenska umdæminu sem og alþjóðahreyfingunni.
Á vefsíðu Rótarýumdæmisins segir umdæmisstjóri; Guðmundur Jens Þorvarðarson í tilefni dagsins m.a. “ Það var ekki í anda Rótarýhreyfingarinnar hér áður fyrr að bera verkefni sín á torg og upplýsa almenning um að Rótarýhreyfingin væri að láta gott af sér leiða. Þetta hefur breyst og nú hin síðari ár hefur Rótarýhreyfingin orðið sýnilegri og má víða í heiminum sjá verkefni, sem hreyfingin hefur átt þátt í að framkvæma.
Ég legg áherslu á að klúbbarnir noti þennan dag til að kynna Rótarýhreyfinguna. Hvert er hlutverk hennar og tilgangur. Það hefur löngum verið mörgum utanaðkomandi ráðgáta hvert er hlutverk Rótarý.”
Það á sum sé að reyna að bæta úr þessu á laugardaginn. Það verður gert með því að sýna t.d. ljósmyndir úr starfi klúbbsins og afrit gamalla fréttabréfa verða á staðnum. Vefsíða Rótrýumdæmisins og klúbanna, sérstaklega þó klúbbsins hér í Ólafsfirði verða kynntar.
Þá verður vitanlega farið yfir þau fjölmörgu samfélagsverkefni sem Rótarýklúbbur Ólafsfjarðar stendur fyrir og hefur staðið fyrir í gegnum tíðina. Skemmtinefnd klúbbsins verður á staðnum og flytur a.m.k. hluti hennar tónlist af írskum uppruna.
Á Kaffi Klöru verður svo eins og ætíð fjölmargt í boði til að gleðja bragðlaukana.
Við hvetjum alla til að mæta og kynna sér starf Rótarý, fá sér kaffi og með því.
Texti: K.Haraldur Gunnlaugsson. Myndir: KHG, frá Rótarýdeginum 2016.
