Enn koma gestir með fyrirlestra.
Þorbjörn Sigurðsson yfirhafnarvörður Fjallabyggðahafna var gestafyrirlesari fundarins 9. mars á vegum Starfsþjónustunefndar, sem sér um erindin þennan mánuð.
Í upphafi erindisins fjallaði Þorbjörn einkum um höfnina í Ólafsfirði, hversu miklu máli hún hafi skipt fyrir uppbyggingu samfélagsins í Ólafsfirði og svo breytta tíma. Hann nefndi tölur um landaðann afla í Ólafsfirði árin 2015 og 2016 og kom fram að hann hafi dregist verulega saman á seinni árum. Í máli hans kom fram að hafnarmannvirki í Ólafsfirði eru í góðu standi og tilbúin fyrir nýja starfsemi sem komið hefur til tals að undanförnu.
Í sameinuðu sveitarfélagi, Ólafsfjarðar og Siglufjarðar – Fjallabyggð eru annars reknar tvær hafnir, hvor á sínum stað. Fór Þorbjörn yfir rekstur þeirra í erindi sínu, ásamt að segja frá viðhaldi og endurbótum sem unnið hefur verið að undanfarið ásamt fleiri þáttum. Ýmist í erindinu sjálfu eða í svari við fyrirspurnum klúbbfélaga.
Fram kom m.a. að í viðhaldsmálum var endurgerð Hafnarbryggjunnar á Siglufirði lang stærsta verkið sem unnið var að á síðustu árum. Bryggjan var stækkuð þannig að ný stálþil voru rekin niður út frá gömlu þiljunum og bryggjan stækkuð umtalsvert , flatarmál nýju bryggjunnar er nálægt því að vera tæplega tvöfallt flatarmál þeirrar gömlu. 
Norðan við bryggjuna var einnig ráðist í þó nokkra landfyllingu, sem er hugsuð til síðari nota. Bryggjan var endurvígð í september á síðasta ári eftir stækkunina og betrumbæturnar sem unnið var það ár. Þó búið sé að endurvígja bryggjuna og hún komin í notkun, er endurbótunum ekki að fullu lokið. Eftir er að fullklára þekjuna og er gert ráð fyrir að því verki verði lokið í sumar. Búið er að bjóða út verkið og er kostnaðaráætlun 99 milljónir. Tilboð hafa borist í verkið og er það lægsta 74 milljónir, það er þó ekki búið að ganga frá samningum við verktaka..
Hann sagði frá komum skemmtiferðaskipa í höfnina á Siglufirði, en þeim skipum hefur fjölgað mikið á undanförnum árum og er búist við nýju meti á þessu ári. Eða 35 viðkomum 10 skipa.
Þorbjörn kom inn á ýmislegt fleira en hér hefur verið nefnt og svaraði fjölmörgum spurningum klubbfélaga í lokin. Erindið var hið fróðlegast og ýmislegt í því sem kom okkur staðkunnugum mönnunum á óvart.
Texti og myndir: K.Haraldur Gunnlaugsson.
