Fregnir frá Rótarýklúbbi Vestmannaeyja
Starfsárið hjá Rótarýklúbb Vestmannaeyja byrjaði á veglegum stjórnarskiptafundi á Kaffi Maríu. Næsta verkefni var að klúbburinn valdi fallegasta garðinn, snyrtilegustu húseignina, best heppnuðu endurbætur á húseign og snyrtilegasta fyrirtækið í ár, í samráði við umhverfisnefnd Vestmannaeyjabæjar. Annars er nokkuð rólegt yfir okkar fámenna klúbbi. Aðeins átta félagar. Við erum að skipta um fundarstað. Fara í Höllina, okkar gamla fundarstað aftur. Þ.e. þar sem við héldum umdæmisþingið árið 2003, sem einhverjum er ef til vill í fersku minni.
Við höfum því í haust haldið fundi aðallega á vinnustöðum okkar til skiptis eins og frumkvöðlarnir gerðu á sínum tíma. Það er alltaf gagnlegt og gaman að kynnast starfi og vinnustað rótarýfélaga okkar, því alltaf fræðist maður um eitthvað nýtt. Við höfum til dæmis fundað í Flugstöðinni, Framhaldsskólanum, Barnaskólanum og Tryggingamiðstöðinni. Einnig heimsóttum við og funduðum í Nýsköpunarstofu og fræddumst um það athyglisverða starf sem þar fer fram. Meðal annars svokallaða Fab Lab tækni.