Rótarýsýning í Amtsbókasafninu á Akureyri

Rótarýklúbbur Akureyrar hefur nú í febrúar staðið fyrir glæsilegri ljósmyndasýningu í Amtsbókasafninu þar sem rakin er saga og hlutverk Rótarýhreyfingarinnar og klúbbsins á Akureyri sérstaklega. Hermann Sigtryggsson, fyrrum íþróttafulltrúi, hefur starfað í klúbbnum í 53 ár og jafnan sýnt því mikinn áhuga að taka myndir af klúbbstarfinu við margvísleg tækifæri. Afraksturinn af þessu gagnmerka starfi Hermanns má sjá á sýningunni auk fleiri mynda sem sýna vel hið mikla framlag Rkl. Akureyrar til félagsstarfs og samfélagsmála í bæjarfélaginu síðan klúbburinn var stofnaður árið 1938.

Það hefur staðið til um nokkurt skeið að sett yrði upp Rótarýsýning í Amtsbókasafninu á Akureyri. Áformið varð að veruleika núna í febrúar og eru sýningarskápar með myndefni og öðrum gögnum á stóru svæði í anddyri safnsins. Utanhúss blaktir rótarýfáninn við hún. Margir hafa tekið þátt í undirbúningsstarfinu, m.a. klúbbfélagarnir María Pétursdóttir og Þórhallur Sigtryggsson, sem unnu að uppsetningu sýningarinnar.

Forysta klúbbsins fagnaði opnun sýningarinnar og færði Hermanni Sigtryggssyni þakkir fyrir alla vinnuna sem hann hefur lagt af mörkum. Á myndinni eru Soffía Gísladóttir, viðtakandi forseti Rótarýklúbbs Akureyrar, Hermann Sigtryggsson og Ragnar K. Ásmundsson, núverandi forseti.

Fjöldi gesta hefur komið sérstaklega til að sjá sýninguna og margir þeirra sem fyrst og fremst eiga erindi í bókasafnið nota tækifærið til að staldra við í leiðinni og skoða sýningu rótarýklúbbsins. Er það áhugafólk á öllum aldri. Sýningunni voru gerð skil í sjónvarpsþætti á N4, sjónvarpsstöð Akureyrar og norðausturlands. Sýningunni lýkur 27. febrúar.

Myndir Hermann Sigtryggsson. Texti MÖA.

Rótarýsýning í Amtsbókasafninu á Akureyri

rotary.is

Leita á vefnum

Fréttir

Samskipti

Útlit síðu:

Tungumál:

Innskráning:

Efraval