Golfmót Rótarý verður haldið 30. júní n.k.
Golfmót rótarýklúbba á Íslandi 2016 verður á golfvelli Kiðjabergs hjá golfklúbbi GKB fimmtudaginn 30. júní 2016. Það er Rótarýklúbburinn Reykjavík-Miðborg sem hefur umsjón með mótinu að þessu sinni. Makar rótarýfélaga eru velkomnir og keppa þeir til allra verðlauna utan sveitakeppninnar.
.jpg "Golfmot-2014-2-(2)")
Mótið er bæði einstaklingskeppni og sveitakeppni klúbba. Þetta er punktakeppni með forgjöf á 18 holum. Veitt verða verðlaun fyrir hæsta punktaskor einstaklings, verðlaun fyrir besta skor einstaklinga án forgjafar, verðlaun fyrir að vera næst holu á öllum par 3 brautum, verðlaun fyrir lengsta upphafshögg og dregið úr skorkortum viðstaddra. Í sveitakeppni telur besti samanlagður árangur tveggja félaga í hverjum klúbbi, og hlýtur sá klúbbur farandbikar.
Öll holl verða ræst út samtímis kl.10:00 um morguninn og er mæting eigi síðar en kl. 9:15. Fyrir ræsingu verður skipt í holl, farið yfir röðun á teiga og staðarreglur.
Að loknum leik verður boðið upp á úrvals súpu með brauði í veitingasal klúbbsins. Eftir yfirferð skorkorta og útreikning verður verðlaunaafhending, útdráttargjafir afhentar og umsjónarklúbbur næsta móts valinn.
Mótsgjald er kr. 7.000 á mann og er innifalið í því vallargjald, súpa og kaffi. Tilboð á bílum er kr. 5.000 fyrir þá sem þess óska. Klúbburinn getur útvegað uþb. 15-20 bíla.
Skráning er til 25.júní og fer fram á www.golf.is en einnig þarf að senda tölvupóst á netfangið kidjaberg@gkb.is með þessum upplýsingum: nafn þátttakanda, kennitala, forgjöf, og nafn rótarýklúbbs ef meðlimur. Fyrirspurnir berist í sama netfang. Mótsstjóri er Jóhann Friðbjörnsson og símanúmer í golfskála er 486-4495.
Forsetar rótarýklúbba eru beðnir um að upplýsa alla félaga um mótið og hvetja alla golfara til þátttöku.
Nánari upplýsingar veitir Sólveig Pétursdóttir S. 863-9996.
Frá mótsnefnd golfmóts rótarýklúbbanna 2016