Skýrslur umdæmisþings 2007 í Reykjanesbæ
Ágætu rótarýfélagar.
Seint um síðir sendi ég frá mér þingskýrslu síðasta umdæmisþings er haldið var í Reykjanesbæ 9. júní 2007. Þingskýrsluna ásamt ársskýrslu umdæmisstjóra fyrir starfsárið 2006-2007 finnið þið hér á síðunni undir: Umdæmið-umdæmisþing-2007.
Við félagar í Rótarýklúbbi Keflavíkur erum ákaflega ánægðir með hvernig til tókst og með góða mætingu rótarýfélaga, maka og annarra gesta og þátttöku í þingstörfum. Við sendum ykkur öllum okkar bestu þakkir.
Ég vona að þinggögn þessi svo og myndir frá formóti og þingi sem nú er að finna í myndasafninu verði félögum til fróðleiks og ánægju. Rifji upp góðar stundir hjá þinggestum og hvetji aðra til þátttöku í þessum samkomum.
Nú styttist óðum í næsta þing og formót er haldin verða á Akureyri 30. og 31. maí n.k. Verðandi forsetum og riturum ber að mæta á formótið en það er, eins og þingið, einnig opið öllum rótarýfélögum. Þarna gefst ákaflega gott tækifæri til að fræðast um Rótarýhreyfinguna og störf hennar og skemmta sér í góðum félagsskap og kynnast rótarýfélögum. Ég hvet ykkur til að fjölmenna á Akureyri 30. og 31. maí.
Á þinginu í Reykjanesbæ voru kynntar nýjar reglur um hvernig bregðast skal við ef upp kemur grunur um kynferðislegt áreiti í æskulýðsstarfi eða ásökun um slíkt. Einnig er fjallað um hvað gera skal til hindra að slíkt gerist. Reglur þessar hafa verið samdar með hliðsjón af reglum dönsku umdæmanna og í samvinnu við alþjóðahreyfinguna sem nú hefur samþykkt þær formlega og taka þær gildi frá og með næsta starfsári. Regluverk þetta er nú að finna hér á síðunni undir: Skiptinemar.
Með rótarýkveðju,
Guðmundur Björnsson
fyrrverandi umdæmisstjóri