Rótarýferð á Íslendingaslóðir vestra
Rótarýklúbbur Reykjavíkur er að skipuleggja ferð á Íslendingaslóðir í Bandaríkjunum og Kanada. Ráðgert er að fljúga frá Keflavík til Minneapolis þriðjudaginn 14. júní og koma heim að morgni föstudagsins 24. júní.
Undir leiðsögn kunnugs fararstjórar verða heimsóttir nokkrir helstu sögustaðir á Íslendingaslóðum vestra og tekið þátt í hátíðahöldum við styttu Jóns Sigurðssonar við þinghús Manitoba í tilefni þess að 200 ár eru þá liðin frá fæðingu hans. Á vegum íslensku afmælisnefndarinnar verður flutt leikin dagskrá eftir félaga okkar Svein Einarsson undir heitinu: Ævistarf og ímynd Jóns Sigurðssonar. Dagskráin er samin í tilefni afmælisársins.
Gert er ráð fyrir að kostnaður fari ekki yfir 210 þúsund kr. á mann m.v. gistingu i tveggja manna herbergi. Þetta gæti þó breyst eitthvað m.t.t. breytinga á flugfargjöldum. Innifalið er flug, allur akstur, öll gisting, morgunverður alla daga, hádegisverður suma daga og fararstjórn. Ferðaskrifstofa Jónasar Þórs sagnfræðings, Vesturheimur, skipuleggur ferðina. Jónas Þór gjörþekkir þessar slóðir, en hann bjó lengi í Winnipeg. Auk Winnipeg verður m.a. farið til Mountain, Gimli og Árborgar.
Ferð á þessar slóðir lætur engan ósnortinn og hér er kjörið tækifæri til að leita uppi ættingja í Vesturheimi.
Gert er ráð fyrir að þátttakendur greiði staðfestingargjald kr. 40 þúsund á mann fyrir 31. janúar.
Þátttöku má tilkynna til Eiðs Guðnasonar, Rótarýklúbbi Reykjavíkur, s. 897 6811 eða esg1@simnet.is Eiður veitir nánari upplýsingar.
Nánar um ferðatilhögun :
Ferðalýsing
Dagur 1: þriðjudagur 14. júní: Flug frá Keflavík 16:35 til Minneapolis. Þar lent um 18:00 að staðartíma. Ekið frá flugvelli til Alexandria í Minnesota (um tveggja stunda akstur) – Boðið upp á hressingu í vagninum á leiðinni. Gist á Days Inn eina nótt.
Dagur 2: miðvikudagur 15. júní: Að loknum morgunverði (09:00) er skoðað norrænt byggðarsafn í Alexandria. Þar er m.a. að finna afar umdeildan stein, The Kensington Runestone, sem lengi var talinn sönnun þess að norrænir menn hafi verið á þessum slóðum á 14.öld. - Frá Alexandria er ekið til Fargo og þar snæddur hádegisverður. (innifalinn í verði)
Að honum loknum er stefnan tekin í norður og ekið til Grand Forks í Norður Dakota og staldrað við í Columbia Mall. Þar eru margar verslanir og úrval matsölustaða. Rétt að hver velji sér mat við hæfi og snæði áður en haldið er til Grafton (um 18:30) og bókað inn á AmericInn. Gist eina nótt.
Dagur 3: fimmtudagur 16.júní: Að loknum morgunverði (09:00) er ekið til Mountain, sem er lítið þorp í miðri nýlendu Íslendinga, sem séra Páll Þorláksson stofnaði árið 1878. Öflugt félag íslendinga er þarna undir forystu Curtis Olafson öldungadeildarþingmanns. Farið verður í skoðunarferð um íslensku nýlenduna í Mountain væntanlega með leiðsögn heimamanna. M.a. er komið á landnámsjörð Stephans G. Stephanson og að minnisvarða Káins og Garðarkirkju og snæddur hádegisverður. Síðan komið við í Icelandic State Park á leið norður að landamærunum. Þetta er merkilegt byggðarsafn sem stendur á íslenskri landnámsjörð.
Þaðan er aðeins um 2 klst akstur á náttstað í Winnipeg. Gist næstu þrjár nætur á Delta Winnipeg.
Dagur 4: föstudagur 17. júní: Frjáls dagur í Winnipeg. Um morguninn má rölta um nánasta umhverfi hótels í miðbænum.
Eftir hádegið er tilvalið er að heimsækja The Forks svæðið, ármót Assiniboine og Rauðár. Hér stunduðu frumbyggjar viðskipti öldum saman og hér myndaðist fyrsti byggðakjarni hvítra á kanadísku sléttunni. Á svæðinu eru söfn, markaðir, ótal smáverslanir, fjöldi veitingastaða og litskrúðugt mannlíf.
Seinni partinn gefst tækifæri til að vera við hátíðahöld við styttu Jóns Sigurðssonar við þinghús Manitoba í tilefni þess að 200 ár eru þá liðin frá fæðingu hans. Á vegum íslensku afmælisnefndarinnar verður flutt leikin dagskrá eftir félaga okkar Svein Einarsson undir heitinu: Ævistarf og ímynd Jóns Sigurðssonar. Dagskráin er samin í tilefni afmælisársins. Þá verður konsert í Winnipeg Art Galleryþar sem m.a. Kór Bústaðarkirkju kemur fram og einsöngvarinn Jóhann Valgeir
Kannaðir verða möguleikar á að sækja Rótarýfund eða hitta Rótarý félaga meðan á dvölinni í Winnipeg stendur.
Dagur 5: laugardagur 18. júní: Frjáls dagur í borginni. Tilvalið að kíkja á safn, Manitoba Museum er í göngufæri. Þar er sögu dýra- og mannlífs á sléttunni gerð einstaklega góð skil.
Þá er verslanir um alla borg opnar á laugardögum svo og kaffi- og veitingahús. Þá er tækifæri til að heimsækja ættingja og vini .
Dagur 5: sunnudagur 19. júní: Morguninn frjáls. Um hádegi verður borgin kvödd, leiðin liggur til Nýja Íslands. Íslenska landnámið hófst með landtöku á Willow Point (Víðirnes) 21.október, 1875. Staðurinn skoðaður og síðan fylgt í fótspor landnemanna og gengið eftir strandlengjunni til Gimli. Farið á byggðarsafnið (New Iceland Heritage Museum) og hlýtt á frásögn um sögu íslenska landnámsins.Bókað á hótel Lakeview Resort og þar gist næstu tvær nætur.
Dagur 6: mánudagur 20. júní: Skoðunarferð um Nýja Ísland. Brottför af hóteli að loknum morgunverði kl.09:00. Ekið til Árborgar við Íslendingafljót. Farið í heimsókn til heiðurshjónanna Rosalind og Einars Vigfusson. Hanne r landsþekktur tréútskurðarmaður en hún stjórnar barnakór. Þaðan verður farið á byggðarsafnið í Árborg og snæddur hádegisverður (innifalinn í verði)
Frá Árborg verður ekið til Mikleyjar (Hecla Provincial Park) með viðkomu á landnámsjörð Jóhanns Magnúsar Bjarnasonar, Arnheiðarstöðum og Riverton.
Í Mikley er að finna áhugavert byggðarsafn sem heimamenn sýna gestum. Hér var útgerð mikil og í einni byggingu eru fiskveiðum á vatninu gerð góð skil. Að lokinn hressingu á veitingastað við höfnina verður eyjan kvödd og nú ekin strandlengjan suður til Gimli. Hér má glöggt sjá hversu lélegt landið er fyrir hvers kyns landbúnað, blautt og sendið. Komið við í Árnesi, fæðingarstað Vilhjálms Stefánssonar landkönnuðar og minnisvarði um hann skoðaður.
Komið til Gimli undir kvöld. – Hátíðarkvöldverður í Johnson Hall í Waterfront Center.
Dagur 7: þriðjudagur 21. júní: Hvíld á Gimli fram yfir hádegi. – Brottför 14:00 og ekið rakleitt suður að landamærunum, yfir þau á náttstað í Grand Forks, í Norður Dakota.
Gist á Lake View Resort, nærri Columbia Mall.
Dagur 8: miðvikudagur 22. júní: Ekið suður til Minneapolis. Hádegisverður (innifalinn í verðir) í Alexandra. Komið á náttstað, Country Inn & Suites seinni part. Íslendingafélagið í borginni verður með móttöku á hótelinu undir kvöld.
Dagur 9: fimmtudagur 23. júní: Heimferðardagur. Tækifæri gefst til að skoða sig um í borginni. Öllum farangri verður komið fyrir í læstu sal á hóteli en brottför þaðan er 16:00.
Flug til Keflavíkur 19:20 og þangað komið að morgni föstudags.
Athugið: Hámarksfjöldi er 50 manns. Gert er ráð fyrir að kostnaður fari ekki yfir 210 þúsund kr. á mann m.v. gistingu i tveggja manna herbergi. Innifalið er flug, allur akstur, öll gisting, morgunverður alla daga , hádegisverður suma daga og fararstjórn.
Svipuð dagskrá og í velheppnaðri ferð Oddfellowa á þessar slóðir í sept. 2010. Þetta er ferðaáætlun í grófum dráttum. Gæti tekið einhverjum breytingum.
Gert er ráð fyrir að þátttakendur greiði staðfestingargjald kr. 40 þúsund á mann fyrir 15. janúar.
Þetta er sent félögum til að kanna hve margir kunni að hafa áhuga á ferð á slóðir Vestur Íslendinga. Sé áhugi fyrir hendi , hafið þá samband við Eið Guðnason s 897 6811 eða esg1@simnet.is Eiður veitir nánari upplýsingar.